احدث المشاركات

(((( رحَلْـت يا عبد الرُّحمن ؟ ))))…بقلم الشاعر/النخيلي محمود رفاعي

قصيدة عامية للشاعر/النخيلي محمود رفاعي
مهداه لروح الشاعر الراحل /عبد الرحمن الأبنودي
(((( رحَلْـت يا عبد الرُّحمن ؟ ))))
رحلـْت يا عبد الرُّحمن؟
رحلت يا خال
وسِبت وراك حزن وموال
رحلت يا واد
وانت المعجون بطمي النيل
“ومخبي في عينيك السِّحراوي”
للشوق قناديل
وناقش على قلبك
هرم ونخيل
سنين وسنين
وانت يا عبد الرحمن
تِغزل في عنيها المواويل
سنين وسنين
وانتَ
بترش جبينها شموس
وحنين
وبتحلم ليها بجناين فرح
ومواسم طرح
وعمر طويل
“من صُغرك
وانت مخاوي
“ومخبي ف عنيك السِّحْراوي”
للضلمه نهار
وبترسم للفجر شرار
وبترسم للنيل شطين
آه يا واد
كان قلبك في العتمه شموس
وراشق في عيون الضلمه فانوس
وف عز الليل المحتار
أبو نجوم مجروحة ودبلانه
ملهاشي مسار
كنت ياواد
بتحلم بنهار
وبتزرع على راس الدرب فنار
رحلت يا عبد الرحمن
“وبلدنا عا الترعه”
لسَّاها “بتغسل شعرها”
مين يا ترى
راح يدفع مهرها؟
ويرسم ف عيون الليل
للشمس مدار؟

يا بو وش أصيل
جواه مزروعه غيطان
وعالقورة حيضان
والعود مهموم
فرع من الزان
وعيون من لون الطين
وف قلبك م الشوق فدادين
و هموم جبلين
وانت أصيل يا عبد الرحمن
طول عمرك إنسان
لاغشك لون
ولا خدعك قرش
ولا عمرك بدَّلت هدوم
ولا غيرت لسان
رحلت يا واد
دا غيطان القمح بتبكي عليك
وتراب الدرب يحن إليك
وحيطان النجع مع العراميس
وقناني الغيط مع الدرابيس
وعيون النيل
جواهم حزن طويل
والأرض بتبكي هويس

رحلت يا عبد الرحمن
والبت الحلوة ف نِني عنيك
ياما لسماها غنيت
وبترابها حلفت
ولحضنها حنيت وبكيت

رحلت يا عبد الرحمن
وسبت وراك حراجي القط
لساه بيعافر في الأيام
لساه شقيان
لساه بيجمع حق رغيف العيش
وحتى الآن
مش قادر يشتري جزمة لوليده
ف يوم العيد
ولا قادر يشتري لبنيته (عزيزه) فستان
ومقضيها رسايل م الغربة
والحال تعبان
ومراته فاطنة احمد عبد الغفار
جوهرته المكنونه
لساها ف قلب الشوق
تتغطى بالأحزان

رحلت يا عبد الحمن
و سِبت (وهيبه)
بنَيَّه حزينه
ما عادتشي تحط لا كحلة ولا زينه
ولا تحت الشجر ف يوم
راح تاكل برتقان
ولايوم راح تشغل في قلوب جِدعان
دي وهيبة سلبوها الفرحه
سرقوا منيها الطرحه
ضاع منها المينا
ورموها ورا قضبان
و(عَدَويه) أهِه
لا راح تركب مركب
ولا هاتعدي بحور
وقليبها المسكين مكسور

رحلت يا عبد الرحمن
ولساه الفجر معاند
متخبي ورا جبلين
واحنا
لسانا تايهين
ومش عارفين على فين رايحين
ولساها القدس قمر مخنوق
وطير محبوس
ولسانا كمان بنبوس
جزم ولاد الجزمة
علشان تتفك الأزمة
فيحنوا علينا
و يدونا لقب تيوس
لسَّاه الأقصى أسير
واحنا يا عبد الرحمن
لا مخالب ولا مناقير
وف وسط الزحمه
تاهت حطين
ياما نفسي يا عبد الرحمن
أروح جواه و اتركَّع
حتى ولو ركعات اتنين

رحلت يا عبد الرُّحمن
واحنا لِسَّانا
بنحلم بنهار
وكنا معاك
بنغنيله موال
أتاري نهارنا
خَطْـفـاه جِنـِّـيـَّه
عَدَّت بيه بحور
دَفـْنـاه في جبل مسحور
واحنا
رجلينا وحْلانه ف طين
ومش قادرين
والكرباج بيلسوع فينا
بتضيع أمانينا
بتوه خطاوينا
وبتهرب بالمشوار
ولا عادشي معانا مهور
كرهتنا بنات الحور

سنين وسنين
وانت بتحكيلهم سيرة أبوزيد
يمكن تصحى نخوتهم
يمكن يصبحوا فرسان
فاكرهم زي زمان؟
دلوقتي ابوزيد
مش لاقي حصان
ضاع منه السيف
و عبده (أبو القمصان)
بقي سِيده
ودياب الزغبي وْليد عمه
في زمان الزيف
باعه بأرخص أتمان

رحلت يا عبد الرحمن
محفور الشوق ف عيونك
والليل موال محتار
ولا عارف يفضل ليل
ولا عارف يبقى نهار

تاخدنا خطاوي الغربة وتودينا
ودولاب الدنيا ياخدنا ويدور بينا
واحنا ما نعرف لينا
إيه آخر عنوان

والله يا عبد الرحمن
ده زمن كداب
غشاش وجبان
دنيا غرورة
مالهاشي أمان
نبني فيها قصور
وف لحظة ريح
نلقاها ضريح
وتِعْلا الأحزان

رحلت يا عبد الرحمن
عالموت مستعجل
عالموت كربان
على أمنة وفاطمة ام قنديل
والشيخ محمود
وتركت الحال والمال
وناديت يا رحيل
طب سلملي عليهم
على فاطمة ام قنديل
والشيخ محمود
والعمة أمنة
وعلى كل الحِبَّـان
وأوعاك تنسى
تاخد للعمة دهان
علشان رُكبتها
ولا تنساشي تقول
انا سيبت ورايا حكاوي
مواويل وغناوي
محفورة ف عمر الأزمان
وقلوب مجروحة
وأصوات مبحوحة من الأحزان
وقول لآمنة العمة
لما ناداني الموت
لـَـبِّـيـت
على طول نطيت
قلت ياواد
بَلا هَمْ
وكفاية شيل حمول
بَلا واد بلا بِت
زي ما قـُلـْتـيـلي تمام
أول ما نداني جَلَحْت
لا همني مال ولا بيت
وأديني ياعمة
لحضنك
جيت
(23/4/2015)

اضف رد

لن يتم نشر البريد الإلكتروني .

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>